STYRKIR

Feb 7 

Written By Thorunn Jonsdottir

Nýtt matsferli fyrir Sprota hjá TÞS

Á fundi Tækniþróunarsjóðs í Nýsköpunarvikunni þann 28. maí 2021 voru kynntar breytingar á matsferli fyrir umsóknir í Fyrirtækjastyrk-Sprota. Breytingarnar eru nokkuð umfangsmiklar og fela í sér að sett verður upp tveggja þrepa kerfi fyrir matsferlið í Sprota og bætt verður við eftirfylgni eftir að styrkur hlýst.

Í febrúar 2022 voru breytingarnar innleiddar og er nýtt matsferli eftirfarandi:

Fasi 1: Umsókn 1 - Mat 1

Í fasa 1 verður lögð áhersla á nýnæmi og verðmætasköpun. Hér er verið að horfa á:

• verkefnið og markmið þess

• stöðu þekkingar

• bakgrunninn og stöðu verkefnis

• nýnæmið

• áskoranir

• viðskiptaleg markmið

Aðeins þær umsóknir sem fá A1 eða A2 í einkunn komast áfram í fasa 2.

Fasi 2: Umsókn 2 - Mat 2

Þær umsóknir sem komast áfram í fasa 2 munu fá 3 vikur frá tilkynningardegi til að fullvinna umsóknina. Umsóknin verður þó opin frá því að opnað er fyrir fyrstu umsóknir í sjóðinn um 6 vikum fyrir umsóknarfrest, svo á meðan beðið er svara úr fasa 1 getur fólk unnið að umsókn í fasa 2.

Í fasa 2 verður lögð áhersla á áhrif og framkvæmd og umsóknir metnar út frá:

• stjórnun verkefnis

• hugverkastefnu

• leið á markað og tengslum

• þekkingu og bolmagni

• verk-, tíma- og kostnaðaráætlun

• gildi samstarfs

• innlendum verðmætum

• Heimsmarkmiðum Sameinuðu þjóðanna

Úthlutun & eftirfylgni

Sjóðurinn hefur þá bætt við eftirfylgni og stuðningi sem veitt er í samstarfi við Icelandic Startups. Stuðningsverkefnið hefur fengið nafnið DAFNA. Þessi fasi felur í sér vinnustofur og stuðning frá ráðgjöfum sem leiðbeina styrkþegum við að skipuleggja næstu skref. Eftirfylgnin stendur styrkþegum til boða tvisvar á ári í kjölfar úthlutunar og er áætlað að bjóða styrkþegum annarra styrkja innan Tækniþróunarsjóðs inn í DAFNA þegar fram líða stundir.

Þið getið nálgast umsóknarformið og fylgigögn á rafrænu umsóknarkerfi Rannís (veljið nýja umsókn, Tækniþróunarsjóður og þar fáið þið möguleika á að velja á milli mismunandi styrkjaflokka). Uppfærðar reglur sjóðsins má svo nálgast hér.

Gangi ykkur vel!